Alexander Agassiz Honored.

Through the courtesy of Professor Goodwin we are enabled to print the following Latin speech, made by Dr. Sandys, Fellow of St. John's, Cambridge, in conferring an honorary degree on Professor Agassiz:

Cum Collegio Harvardiano antiquitus consociati, nuper vetera amicitiae iura auspiciis optimis renovavimus; litteris datis acceptisque trans maria lata dextras iunximus; legatis denique Insignibus missis, ludis illissaecularibus, etiam absentes, velut praesentes interfuimus. Hodie vero e Collegii illius professoribus unum re vera praesentem videmus, virum et suo et patris et Collegii sui nomine nobis dilectum. Donec Alpium inter culmina ingentes illae glaciei moles desuper paullatim descendunt, tam diupatris illius nomen superstes vivet, qui, in Republica non magna natus, Rempublicam maximam gloriae suae fecit participem, expertus scilicet vetera illa verba quam vera essent:

"Omne solum forti patria est, ut piscibus aequor,

Ut volueri vacuo quicquid in orbe patet."

Filii vero famam patre tanto non indignam, quibus potissimum verbis exsequi potero? Utinam tu mihi hodie adesses:

O testudinis aureae

Dulcem quae strepitum, Pieri, temperas;

O mutis quoque piscibus

Donatura cycni, si libeat, sonum.

Atqui Musa illa vocata non audit; rogata tacet; virumque praeconio altiore dignum sermone pedestri laudandum relinquit. Ergo, utcunque possumus, virum libenter laudamus, qui, cum ingenii sui ope aeris thesaurum ingentem invenisset, Academiam suam divitiarum suarum amplitudine ornavit, iudice me (insusurrare mihi videtur Horatius), iudice me, "non sordidus auctor naturae verique." Quid autem de vivario illo dicam, aequoris Atlantici prope marginem ulteriorem condito, ubi maris immensi miracula minutis-sima ab hoc viro accuratissime examinantur, ubi oceani ipsius e penetralibus profundis rerum naturae veritas ipsa audacter extorquetur? Satis erit hodie de veritate illa dicere quad olim de Romanorum virtute dictum est:

"Merses profundo; pulchrior evenit."

Duco ad vos marinae praesertim zoologiae indagatorem indefessum, Alexandrum Agassiz.